भगवान (?) को असामयिक निधन, भक्तप्रति समवेदना

आफुलाई ९६ बर्षसम्म केहि नहुने भनी बताएका सत्यनारायण राजु उर्फ साइबाबाको ८५ बर्षको उमेरमा असामयिक निधन भएको छ । चिकित्सकहरुले बताए अनुसार उनको निधन आज बिहान ७ बजेर ४० मिनेटमा भएको हो । आफुलाई शिरडी साईको पछिल्लो जन्म बताएका उनको आफै प्रतिको भविष्यवाणी निरर्थक भएको छ । सत्यसाईबाबाले आफ्नो उमेर ९६ बर्ष भनेकाले उनलाई केहि हुदैन भनेर उनी फर्किनेमा कतिपय उनका भक्तहरु निर्ढुक्क थिए । तिनका तीन करोड भक्त प्रति समवेदना ।

जीवनभर विवादमा रहेका साइबाबाको मृत्यु पनि विवाद बिचै गुज्रियो । अस्पतालबाट आएका फरक फरक प्रकृतिका विज्ञप्ती र भक्तबाट उनलाई जिउँदै समाधिमा राख्ने आग्रहसम्मको विवादले उनलाई मृत्युसम्म नै विवादले पछ्याइरह्यो ।

उनले जीवनकालमा गरेका चमत्कारहरुलाई जादु मात्र मान्नेको जमात पनि कम थिएन । तर पनि उनका भक्तहरुलाई यसकुराले खासै असर गरेको थिएन । उनलाई यसका अतिरिक्त उनकै पुर्वभक्तबाट नै यौन दुव्र्यवहार भएको कुरा सार्वजनिक भएका थिए ।

आउने भनिएका र बाँकी साइबाबाहरु

उनले सन् २०२२ मा आफ्नो मृत्यु पछी नयाँ अवतारका रुपमा प्रेमसाई भन्ने अर्का नयाँ भगवानको जन्म हुने बताएका थिए । अब फेरि अर्को कुन मानिस चाहिँ 'म पुट्टपर्तीको साइबाबाको नयाँ अवतार हुँ' भनेर आउला त्यो चै समयले नै बताउँने छ ।