नयाँ बर्षमा मुर्गा हुनुहोला है ! नमुना हेर्नुहोस्

इन्टरनेटमा सामाजिक साईटहरु वरदान भएका छन् । खासगरी फेसबुक, ट्विटर, युट्युब जस्ता साईटहरुले इन्टरनेट जुनसुकै वर्गका इन्टरनेट प्रयोगकर्ताहरुलाई आफ्नै तरिकाले प्रयोग गर्ने छुट दिएको छ । हिजोआज यी साईटहरु सबैथोक भेला हुने र सबै कुरा देखाउँन सकिने ठुला प्रदर्शनीस्थल भएका छन् । अब प्रदर्शनीस्थल नै भईसके पछि त सबै किसिमका मानिसहरु जम्मा हुने नै भए, चोर, फटाहा, ढाँट, मुर्ख सबै । यस्ता बहुरुपीहरुले हामीलाई थाहै नपाई मुर्गा बनाउँछन् । अझ चाडपर्व र उत्सवको समयमा त यो चर्को हुन्छ । आउँदै गरेको अंग्रेजी नयाँबर्षको अवसर भन्दै फेसबुकहरुमा सुरु भईसकेको छ मुर्गा बनाउँने खेलहरु । एउटा उदाहरण हेर्नुहोस्



मेरो फेसबुकमा एउटा लिंक आयो अंग्रेजीमा लेखिएको थियो कि यो लिंकमा क्लिक गर्नुहोस् र पाउँनुहोस् ५०० बराबरको मोबाईलको रिचार्ज कार्ड । मैले थाहा पाएसम्म यस्तो कही पनि छैन, उपहारहरु हुनसक्छ । तर एउटै लिंक क्लिक गरेको भरमा ५०० को रिचार्ज कार्ड, अँह कुनै पनि हालतमा सम्भव छैन । यो मुर्गा बनाउँने काईदा हो, प्रस्ट थियो । कसरी बनाउँदा रहेछन् भनेर क्लिक गरे । लिंकले लग्यो एउटा ब्लगमा ।

ब्लग भरी नानाथरीका लिंकहरु थिए, जसमा फेसबुकका पेजहरु थिए । आग्रह भनौं या के, लेखिएको थियो सबै पेजहरुलाई लाईक गर्नुहोला अनि पाउँनुहुन्छ ५०० को रिचार्ज ।

अझ त्यती मात्र होइन, सबै पेजका लिंकहरु आफ्नो फेसबुक प्रोफाईलमा पनि अपडेट गर्नु पर्ने रे ।

अपडेट गर्दा पनि बेग्ला बेग्लै पेजमा रे ।

अनि यो गरि नसक्नुको काम गर्न तपाईलाई घण्टौ लाग्छ । लौ गर्नु पनि भो रे, त्यहाँ एउटा फोटो छ, जसमा लोडिङ लेखेको छ र त्यो घुमिरहन्छ (सबैभन्दा माथिको फोटो हेर्नुहोस् ) । सो फोटोको तल लेखिएको छ, 'तपाईले अझै गरिसक्नु भएको छैन ।' तपाईलाई त्यती बेला लाग्ला, ओहो मुर्ख भईसकिएछ ।

यो एउटा उदाहरण मात्र हो । यस्ता धेरै लिंकहरु आउँलान् । जोगिनु होला । बेकारमा समयको बर्बाद किन गर्नु ? होस गर्नु कुनै लिंकहरुमा यस्ता एप्लिकेसन हुन्छन् जुन तपाईले क्लिक गर्नु भएमा तपाईको प्रोफाईलमा पुग्छ र तपाईको बेइज्जत हुन सक्छ ।

तर सबै लिंकहरु यस्ता मुर्गा बनाउँने खालका पनि हुँदैनन् नि ।