बिहे गरुम्, सुनका चै कुरै नगरुम्

मंसिर महिना बिहेको महिना । जति नजिकिदो छ, सुनको भाउले उति नयाँ नयाँ उचाई लिदै छ । सोमबार र मंगलबार ५५ हजार २ सयमा कारोबार भएर नै महगोंको किर्तिमान राखिरहेको सुनले आज बुधबार थप मुल्य लिदै ५५ हजार ४ सयको नयाँ किर्तिमान कायम गरेको छ । बिहेमा सुनको कति अर्थ छ भनेर मैले के भनिरहनु ? तपाई महिला हुनुहुन्छ भने तपाई जन्मजात ज्ञाता हुनुहुन्छ । र, पुरुष हुनुहुन्छ भने छेउमा कोही महिला छन् भने सोधे पुग्छ । त्यस्तो अर्थपुर्ण सुनको मुल्य यसरी अकाशिए पछि बिहेमा कति अफ्ठ्यारो पर्ला ? मुखै फोरेर भन्न त नमिल्ला तर बाध्य भएपछि नभनेर के गर्नु ! अब बिहेका लागि केटी माग्न जाँदै भन्दा हुन्, 'बिहे गरुम्, सुनका चै कुरै नगरुम् ।' महिलाका लागि सुनको अर्थसँग मेरो रमाईलो अनुभव छ, पढ्नलाई भित्र आउँनुहोस् । तपाईका अनुभव पनि कमेन्टमा लेख्नुहोस् है ।



म यो घटनाको समयमा ताप्लेजुङमा पढाउँथे । घटना त्यहीको हो । मैले डेरा लिएको घरमा कान्छादाईको बिहे भयो । बिहे धुमधाम । विदेश बसेर आएका दाईले विदेशबाटै सुन ल्याएका रहेछन् । उनकी दुलहीलाई पुग्दो । बिहेका दिन गाउँका मान्छेले दुलहीलाई सुनैले पनि हेर्न लायक बनाएको भनेर कुरा गरेको सुनेको थिएँ मैले । भाउजु पनि राम्री थिइन् ।

मैतालु फर्काएर आउँदा अघिल्लो पटक जस्तो रुँदै आईनन् भाउजु, हास्दै हास्दै आईन् । तर घर फर्किएको केही दिन पछि मैले भाउजुलाई रुँदै गरेको देखेँ । मैले केही भएछ कि भनेर जेठी भाउजुलाई खबर गरिदिए । भाउजु र घरका मान्छे आएर नरुन भन्दै रुनुको कारण सोधे । भाउजुले निकै समय लिएर सुक्सुकाउँदै भनिन्, यो सुन त ग्यारेन्टिको रे । गाउँमा त्यस्तै भन्छन् । (मलाई त ग्यारेन्टीको सुन भनेको के हो भन्ने पनि थाहा थिएन । जेठी भाउजुले पो भनिन्, उही क्या सुन भन्दा कम छैन हराएमा डर छैन ।) अब भो । दाईले कड्किएर सम्झाएपछि सबै साम्य भएको थियो ।


त्यस्तो हुँदो रहेछ सुन । जन्मे देखि त्यत्रो हुन्जेल बसेको घर, परिवार सबै बिर्सिएर हास्न थालेकालाई पनि रुवाउँन सक्दो रहेछ सुन । अब त्यस्तो सुन जो सुकैले किन्न नसक्ने भएपछि कति गा¥हो पर्ने होला खै !