अबको जेठ १४ एक्लै जाँदैन

-गोकर्ण अधिकारी-
पटक पटक संविधान निर्माणको कार्यतालिका बनाएका मुख्य दलहरुले आजसम्म चुनावपछि एउटै बिषय समयमा पुरा गरेका छैनन् । संविधान निर्माणका बिषयमा दलहरुबीच भिन्न मत त छदैछ एउटै पार्टीमा समेत फरक फरक विचार हुँदा दलहरुबीच सहमतिको प्रयास हुने समयभन्दा पार्टीभित्रै विवाद सुल्झाउँन दलहरुले बढी समय खर्च गरेको देखिन्छ । तर हाम्रो दुर्भाग्य अनि दलहरुको गैरजिम्मेवारी कि उनीहरु कुनै पनि हालतमा आफ्नो गल्ति मान्दैनन् ।

भातृसंस्थाको विगठनको फन्दामा फसेको कांग्रेस आठ महिनाभन्दा बढी एउटै बिषयमा अल्झियो जसका कारण उसले पार्टीको कारण संविधान निर्माणमा कतै कँही असर नपारेको दाबी गरे पनि संविधान निर्माण र शान्ति प्रक्रियाका सन्दर्भमा कांग्रेसले ठोस धारणा बाहिर ल्याउँन सकेन । यसले गर्दा शान्ति प्रक्रिया उसले माग गरे अनुसार उसकै कारण अघि बढ्न सकेन ।



त्यस्तै नेकपा (एमाले) भित्रको दुई खेमाको रडाको समेत सरकारको हानाथाप नेताहरुबीच रहिरह्यो । संविधान निर्माणभन्दा सहमतिय सरकारकै बढी जोड दिएको एमाले सहमतिकै नाममा दुई पटक सरकारको नेतृत्व हत्याउँन सफल पनि भयो । तर, शान्ति प्रक्रिया र संविधान निर्माणमा सहमति जुटाउँन सफल भएन । यसको मुख्य कारण भने एमाले भित्रैको विवाद रह्यो, जुन उसले स्विकारीसकेको छ ।

अर्को दल एनेकपा माओवादी संविधानसभामा सबैभन्दा ठुलो दलका रुपमा त छ । तर ठुलो दलभित्रको ठुलो र सँधै भइरहने विवादले संविधान निर्माण र शान्ति प्रक्रियामा सहमति सबैभन्दा बढी अर्घेलो गरिरहेको छ । जुन अहिले पनि उस्तै छ ।


सरकारमा भएर पनि विभक्त मधेस केन्द्रित दल र तिनका विवादास्पद छवि र निर्णयका कारणसमेतले शान्ति प्रक्रियाले अपेक्षाकृत गति लिन सकेन । यो कुरा पूर्वरक्षामन्त्री शरतसिंह भण्डारीको भनाईले पनि पुष्टि गरिसकेको छ । यसरी दलहरुको आन्तरिक विवाद र दलहरुबीच भएको अस्वस्थ सम्बन्धले रोकिराखेको संविधान निर्माण र शान्ति प्रक्रियालाई साँच्चै समयमै टुंग्याउँन दलहरुले चाहेका हुन् भने सबैभन्दा पहिले पार्टी भित्रकै विवाद सुल्झाउँन आवश्यक छ ।

त्यस्तै दलहरुबीचको सम्बन्ध पनि सुमुधुर हुनुपर्छ । अन्यथा फेरि पनि जेठ १४ आउँनेछ र जानेछ । तर फरक यति हो अबको जेठ १४ आफुमात्र जाने छैन । दलहरुप्रतिको विश्वास अनि नेपाली जनताको आशा भरोसा सबै सँगै लिएर जानेछ । आशा गरौँ, त्यस्तो जेठ १४ नआओस् ।

तपाईलाई कस्तो लाग्छ कमेन्टमा लेख्नुहोस्