सावधान घरमुली ! घरै नरहला !!

घरको अधिकतम प्रयोग गरेर ठालु पल्टेकाहरुलाई आज विश्वभर नै सचेत गराईदैछ । खासमा यो घर जसले आफुलाई घरमुली या संरक्षक भनेर दाबी गर्छ, उबाट नै दिनानुदिन बिग्रदो छ । घरको अलिकति पनि वास्ता नगरि खाली आफ्नो दुनो सोझ्याउँने मात्र दाउ हेर्दा घर यस्तो भएको भन्नेमा कुनै घरमुलीले बिरोध पनि गर्दैन । तर समर्थन जनाएर मात्र घर बनिदैन । यति याद राखौं, आफुले बिगारेको घर अर्कोले सच्याई दिदैन, बनाई दिदैन । जति सकिन्छ चाँडो घरको सुरक्षाका लागि सोच्ने बेला भएको छ । बेला बित्न नपाओस् । मैले मात्र यस्तो गरेको हो र ? अथवा म एउटाले गरेर के नै हुन्छ र ? भन्ने जस्ता बहाना बनाएर कोही पनि उम्कन पाउँदैन अब । यसलाई चेतावनी हो भनेर बुझे पनि गल्ति हुदैन । वास्तवमा यो अप्रत्यक्ष चेतावनी नै हो ।

घर भनेको आफु बस्ने र आफुले बनाएको मात्र होइन । पृथ्वी हामी सबै प्राणीको घर हो । तर हामी पृथ्वीलाई हामी मानवको मात्र ठान्छौ । या आफुलाई यसको मालिक या संरक्षक मान्छौ । खोइ हामीले मालिक भएपछि कर्तव्य पुरा गरेको ? दिनदिनै प्रदुषणले पृथ्वी खराब हुँदै जादैछ । यहाँको वातावरण प्रतिकुल बन्दैछ । प्राकृतिक सम्पदाहरु या त रित्तिदै छन् या त बिग्रेर सम्हाली सक्नु छैन । यसको दोष हाम्रो हो, हामी सबैलाई थाहा छ । तर गरिब देशले धनीलाई र धनी देशले गरिबलाई दोष बोकाइदैछ । यसले पक्कै पनि पृथ्वीको वातावरण सुधार्दैन । हिजोका जंगलहरु आज शहरमा परिणत भएका छन् । विकाशको चरमताले विनाश तिर जादैछ पृथ्वी, हाम्रो घर । भन्न मन लाग्छ, सावधान घरमुली घरै नरहला । आजै देखि खाली ठाउँहरुमा रुखहरु रोप्ने हो र हरियाली बढाउँने हो भने पनि यो प्रतिकुलतामा उल्लेखनिय कमि आउँनेछ । हाम्रो घर पृथ्वी पनि सुरक्षित हुनेछ ।

यसैले चेतना विस्तारका लागि अथवा सबैलाई उत्तरदायी बनाउँन पृथ्वी दिवस मनाईदैछ । यो पृथ्वी दिवस  अमेरिकी सिनेटर गेलर्ड नेल्सनको अगुवाइमा सन् १९७० देखि हरेक वर्ष अप्रिल २२ मा पृथ्वी दिवस मनाउन सुरु गरिएको  पृथ्वी दिवसको निरन्तरता हो । दुई वर्ष अघि संयुक्त राष्ट्रसंघले अप्रिल २२ लाई अन्तराष्ट्रिय पृथ्वी दिवसको रुपमा मनाउने निर्णय गरेको थियो । सन् २०११ अन्तराष्ट्रिय वन वर्ष समेत रहेकाले यो वर्षको पृथ्वी दिवसलाई वन संरक्षण र हरियाली वृद्धिमा केन्द्रित गरिएको छ । यसैले यसपालीको पृथ्वी दिवसको नारा छ, हरियालीका लागि अरबौं प्रयास । आउँनुहोस् पृथ्वी हाम्रो घर रक्षाका लागि हरियाली बढाऔं । आजको दिनमा पृथ्वी आफ्नो घर प्रति समर्पण गर्दै एउटा मात्र भएपनि रुख रोपौं ।

एकपटक आफुलाई सोध्नुहोस् त, तपाईले कहिले रुख रोप्नु भएको छ ?