सभासदलाई खुला पत्र

-हिमालचन्द्र बराल-

सभासदज्यूहरु,

यसरी देश र जनताको भलाईको कसम खाँदा
 हामी कति खुसी थियौं । तर आज  !

तपाईहरुले देशलाई गतिहिन र अनिर्णयको बन्दी बनाए पनि समयको गति रोक्न सक्ने कुरो भएन । फलस्वरुप जेठ १४ शान्ति र संविधान निर्माणको सवालमा चरम नैराश्य र अन्योल बोकेर आउँने निश्चित छ । तर तपाईहरुमा शान्ति र संविधान प्राप्तिको जनअभिलाषा सम्बोधन गर्न नसकेकोमा रत्तिभर पश्चाताप र लज्जाभाव देखिएको छैन । उल्टै तीन बर्षमा विश्वमा कही पनि संविधान बनेको छैन भन्ने कुतर्क गरेर समय अपुग भयो भन्दै गैरजिम्मेवारीपन प्रदर्शन गरिदै छ । आखिर बितेका तीन बर्षमा के चाहिं गर्नुभयो जसले गर्दा जनता तपाईहरु प्रति आक्रोशित नहोऊन् । जनताको रगतपसिनाबाट सिञ्चित राज्यकोषबाट भत्ता मात्र पचाउँनुहोस् । सहमती, सहकार्य र एकताको मूल्यमान्यताको खिल्ली उडाउँदै मेरो गोरुको बाह्रै टक्का भने झै आआफ्नै स्वार्थपुर्ण हठ र अर्थहिन अडानको आगोमा राजनीतिलाई झोस्नुभयो । तपाईहरुका अनैतिक क्रियाकलापहरुले संविधानसभाको गरिमालाई अपमानित गरेको छ । अब फेरि कुन मुखले संविधानसभाको म्याद पुनः १ बर्ष थप गर्ने प्रस्ताव गर्दै हुनुहुन्छ ?





एक नागरिकका हैसियतले तपाईहरु आफुले निभाएको भूमिकाको आत्ममूल्यांकन गर्नुस् त ? के तपाईहरुले इमानदारीसाथ जनादेशको पालना गर्नुभयो ? के जनताले अपार आशा र भरोसाका साथ तपाईहरुलाई दिएको अमूल्य मतप्रति न्याय गर्नुभयो अनि इतिहासले सुम्पेको मातृभुमिप्रतिको अभिभारा पुरा गर्ने कार्यमा खरो उत्रन सक्नुभयो ? राजनीतिलाई तपाईहरुले आफूले गरेको लगानी उठाउँने व्यापारको रुप दिएर बदनाम गर्नुभएको छ । जब कुनै पनि देशको राजनीतिको लगाम पथभ्रस्ट र स्वार्थी नेताहरुका हातमा पुग्छ, तब त्यो देशको भविष्य अन्यौलको घना अन्धकारमा भौतारिन विवश हुन्छ । सायद यतिखेर नेपाल र नेपाली जनता त्यही पीडादायी नियति भोगिरहेका छन् । देश, जनता र समयको मागलाई प्राथमिकता दिनुको साटो तपाईहरुले आफू र आफ्नो पार्टी मात्रको सोच र स्वार्थको मोहजालमा डुब्दै देशलाई गतिरोधको भड्खालोमा जाकेर सबैलाई निराश बनाउँनु भएको छ ।

सबैलाई याद रहोस्, यो देश कुनै जुवाघर होइन । यहाँ कुनै व्यक्तिबिशेषलाई आफ्नो उच्च महत्वाकांक्षा पूर्तिका लागि सिंगो देशको अस्तित्व र जनताको भविष्यलाई समेत दाउमा लगाउँने केही विशेषाधिकार छैन । त्यसैले तपाईहरुका लागि केवल एउटा मार्ग खुला छ, विगतमा आफूले गरेको कर्तुत, नालायकीपन र जनमतमाथिको धोकाधडीप्रति आत्मालोचनासहित जनतासामू माफी मागेर थपिएको अवधिमा हरहालतमा शान्ति र संविधान निर्माणको काम फत्ते गरेरै छाड्ने प्रण गर्दै अन्तिम अवसरका लागि अनुरोध गर्ने । अन्यथा, तथाकथित बहुमतका बलमा ऐतिहासिक भूलप्रति प्रायश्चित नगरि संविधानसभाको म्याद थप्ने अर्को भूल गरेमा जनताले त्यसको अनुमोदन गर्नेछैनन् । कृपया नबिर्सनुुस्, एउटा भूललाई अर्को भूलले कहिलै पनि सच्याउँन सक्दैन ।

सचेत नेपाली नागरिक