अपडेट : यो मात्र होइन आशिष लुइटेल अरु पाँचवटा हुबहु उल्था गरेका लेखहरु पनि भेटिए । अन्तत आशिष लुइटेल कान्तिपुरकै माघ २७ गतेको 'शुक्रबार'मा माफी माग्न बाध्य भए । कान्तिपुरले सोही अंकमा क्षमायाचना गर्दै आशिष लुइटेललाई उनी संयोजक रहेको 'शुक्रबार'को जिम्मेवारीबाट हटाइएको जानकारी दियो ।
सानो हुनुमा धेरै बेफाइदाहरु होलान् । तर अरुबाट लुक्न या नदेखिन निकै सजिलो हुन्छ । मनमा लागेका कुरा निर्धक्क भन्न पाईन्छ, गर्न पाईन्छ । चाहे हरेक शब्दहरु अरुबाट चोरिएका किन नहुन् । कसैले यादै गर्दैन । सानो हुँदा बडा स्वतन्त्र हुन पाइने । मज्जा हुन्छ ।
ठुलो हुँदा पनि फाइदाहरु छन् तर माथि भनिएजस्तो सानाले लिने फाइदा ठुलाले लिन सक्दैनन् । अलिकति केही हुन हुन्न अरुले देखिहाल्ने । औला तेर्साइहाल्ने । उसै त अग्लो कद, ठुलो ज्यान यसो फैलिन खोज्यो झन् प्रस्टै देखिने । अनेक किसिमका अफ्ठ्यारा आइलाग्ने । ठुलो भएपछि स्वतन्त्रता भन्ने चिजै नरहने । बडा खुम्चिएर बस्नु पर्ने । बेमज्जा हुन्छ ।
कान्तिपुरलाई नै हेर्नुहोस् न । अँ, उही क्या नेपालमा सर्बाधिक बिक्री हुने राष्ट्रिय दैनिक । कस्तो नबुझेको काठमाण्डौ, विराटनगर, भरतपुर र नेपालगञ्जबाट एकैसाथ प्रकाशित हुने क्या । अब थाहा पाउँनु भयो कति ठुलो छ भनेर । हो कान्तिपुरले आज अलिकति यसो तन्किन खोजेको रहेछ, केटा मोरा (प्यारो गरेर भनेको है) हरुले थाहा पाई गए ।
भित्र आएर हेर्नुहोस् न ठुलो भएर कान्तिपुरलाई के अफ्ठ्यारो परेछ ।
