कान्तिपुरले यो ठिक गरेन

सबै तथ्यहरु समाचार बन्न सक्दैनन् । झट्ट सुनेको भरमा या प्रभावका भरमा समाचार प्रकाशित गर्दा कतिको प्रत्युत्पादक हुन सक्छ । यसको उदाहरण डा. भक्तमान श्रेष्ठको अपहरणको समाचार होस् या भर्खर मात्र चर्चामा आएको अनुजाको ९१ लाख काण्ड नै काफी छ, जुन हाम्रो अगाडि ऐना सरि उभिएको छ । यसले वास्तवमा प्रकाशकको विश्वसनियता घटाएको छ । हचुवाका भरमा समाचार सम्प्रेषण गर्दा यसले प्रत्रिकाको विश्वसनियता घटाउँने मात्र होइन, समाजमा समेत नकारात्मक असर पर्दछ । यसकारण समाचारले समाजमा पार्ने असर विचारेर मात्र समाचार सम्प्रेषण गर्नु पर्दछ । तर भर्खर मात्र अनुजा प्रकरणमा गल्ति गरेर माफी मागेको कान्तिपुरले पुन समाजलाई पछाडी धकेल्ने कुप्रथालाई प्रश्रय दिदै बैशाख २५ गतेको अंकमा कुनै सकारात्मक कदमको प्रशंसा गरे झै समाचार प्रकाशित गरेको छ । हेर्नुहोस् पुरा समाचार

दाइजो प्रथा नेपाली समाजको भयानक विकृतिको रुपमा रहेको छ । अझ तराइमुलका नागरिकहरुमा यो कुप्रथा अझ व्यापक र गहिरो छ । दाइजो थोरै ल्याएको वा नल्याएको भन्दै महिलाहरु मारिने क्रम जारी छ । यही दाइजो प्रथाका कारण कतिपय नारीहरुको जीवन नरकतुल्य बनाएको छ । तर यही प्रथालाई प्रश्रय मिल्ने गरि कान्तिपुर द्धैनिकमा आज बैशाख २५ गतेको अंकमा यस्तो समाचार प्रकाशित गरेको छ ।

समाचारमा संवाददाता अहिलेको विवाहमा जिन्सी उपहार लानु नपरेकोले खुब सजिलो भएको बताउँछन् । साथै उनले दाइजोमा सेयर दिनु निकै ठुलो कामका रुपमा प्रमाणित गर्न तथ्य प्रस्तुत गर्दछन् । 

वास्तवमा दाइजो प्रथा निर्मुल गर्न कानुनी रुपमा मात्र नभए सामाजिक रुपमा पनि निकै कामहरु भइरहेका छन् । दाइजो प्रथालाई कुप्रथाका रुपमा व्याख्या गर्न कुनै कानुनी धाराको वर्णन आवश्यक छैन । यसलाई हाम्रै घरसमाजमा हेरे पुग्छ । यो अमानविय प्रथालाई रोक्न सबै जागरुक हुनु पर्ने हो । तर त्यसको विपरित दाइजोका रुपमा जिन्सी सामान नदिएर अझ सेयर दिन उक्साउँने खालको समाचार कान्तिपुरमा प्रकाशित हुनु खेदपुर्ण छ ।