स्कुल पढ्न जान पनि जोरविजोर प्रणाली

एकपटक सोच्नुहोस् त, विद्यार्थीहरु नियमित स्कुल किन जादैनन् ?
१. बन्द र हड्तालको कारणले ।
२. बिरामी हुने भएकाले ।
३. पढेर भ्याउँने होइन, भ्याउँदा पढ्ने नत्र घरको काममा अल्झिनुपर्ने भएकाले ।
४. गृहकार्य नगर्दा पिटाइको डरले वा पढ्न अल्छि गर्नाले ।

तर यी जवाफहरु भन्दा बाहिर अरु कारण पनि छन् जसको कारण विद्यार्थीहरु दिन बिराएर विद्यालय जान बाध्य हुन्छन् ।


विस्तृत विवरण यस्तो छ



जाजरकोट जिल्लाको उत्तरपुर्वी बारेकोट गाविसस्थित एक विद्यालयका विद्यार्थीहरु आलोपालो गरेर स्कुल जाने गर्छन् । सबै विद्यार्थी विद्यालय जाँदा कक्षाकोठामा नअट्ने भएपछि स्थानिय हिमज्योति प्राविले आलोपालो नियम लागू गरेको हो ।

सबै विद्यार्थी आउँदा नअट्ने भएपछि आलोपालो प्रणाली लागू गरिएको विद्यालयका प्रधानअध्यापक प्रेमकला गिरीले बताइन् । "दुइ कोठामा पाँचवटा कक्षा सञ्चालन गरिरहेका छौ, सबै विद्यार्थी अट्दैनन्", उनले भनिन्, "विद्यार्थी बस्ने ठाउँ र बेञ्च नपुगेपछि एकदिन जोर र अर्को दिन बिजोर रोलनम्बर भएका विद्यार्थीलाई बोलाउँने गरेका छौ ।"

५ बर्ष अघि स्थापना भएको सो विद्यालयमा ३ कोठे भवन भएपनि दुईवटा कोठामात्रै शिक्षणका लागि प्रयोगमा ल्याइएका छन् । एउटा कोठामा विद्यालयको कार्यालय र अर्को कोठामा देउताथानको सामानहरु राखिएको छ । विद्यालय बनाउँदा देउताथान भत्काएर बनाएकाले एउटा कोठा देउताथानलाई दिइएको हो ।




सो विद्यालयमा शिक्षकपनि दुईजना मात्र रहेका छन् ।
स्रोतः नयाँ पत्रिका र सुमन गिरी (स्थानिय)