क्रिकेट र फुटबल दुबैमा हरायोले अफगानिस्तानले

नेपाली खेलकुदका लागि आजको दिन निकै दुर्भाग्यपुर्ण रह्यो । मौसमको कारणले ढिलो गरी सुरु भएको खेल १६ ओभरमा छोट्याइएको थियो । टस जितेको नेपालले पहिले ब्याटिङ गर्दै निर्धारित १६ ओभरको खेलमा ९ विकेट गुमाएर ६८ रन मात्रै बनाउन सक्यो । त्यसलाई ९.३ ओभरमा एक विकेट गुमाएर अफगानिस्तानले सहजै पार गर्‍यो । यसरी चकनाचुर भयो नेपालको क्रिकेटमा उपाधी जित्ने सपना ।

क्रिकेटमा हारे पनि आजै हुने साफ सेमीफाइनलमा नेपालले बदला लिन्छ भन्नेमा निकै भरोसा थियो । हुन पनि फिफा बरियतामा नेपालभन्दा अफगानिस्तान निकै पछाडी छ । र, पहिलेको खेलहरुमा नेपालले अफगानिस्तानलाई हराएकै पनि थियो । तर कुनै तथ्याकं र अनुमानहरु सफल भएनन् । नब्बे मिनेट पछाडी थपिएको तीस मिनेटको समयमा अफगानिस्तानले नेपाल विरुद्धमा एक गोल गर्‍यो । बस्, एक गोल नै काफी भयो नेपालको हारको लागि ।



नेपालको दुबै हारको तुलना गर्ने हो भने क्रिकेटमा चित्त बुझाउँने ठाउँ छ । क्रिकेटमा नेपालली खेलाडीले कुनै पनि भुमिका राम्रोसँग निभाउँन सकेनन् । यसअघिका खेलहरुमा व्याटिङ नचलेको नेपालको अफगानिस्तानविरुद्धको खेलमा भने बलिङ पनि चलेन । उसो त हुस्सुका कारण ओसिएको मैदानमा टस जितेर पनि व्याटिङ रोज्ने कप्तान पारस खड्काको निर्णय आफैमा आश्चर्यजनजक थियो । समग्रमा आफ्नै कमजोरीले हार्‍यो क्रिकेटमा नेपाल अफगानिस्तानसँग । तर फुटबलमा ?

फुटबलमा नेपालले उत्कृष्ट खेल प्रदर्शन गरेकै हो । खेलको अधिकांश समय नेपाली खेलाडीले बललाई आफ्नो बशमा राखिरहेकै थिए । तर बल डिबक्समा नै घुमाउँने परम्पराबाट भने नेपाली खेलाडी आज पनि बाहिर निस्कन सकेनन् । खेलमा हारजितलाई सामान्य रुपमा बुझ्ने हो भने नेपाल र अफगानिस्तानको खेल एकदम रोमाञ्चक नै रह्यो । खेलको अन्त सम्म पनि के हुने हो भन्ने रोमाञ्च रहिरह्यो । खेल सकिन केही सेकेन्ड बाँकी रहदा यसपाली पनि नेपालले फ्रिकिक पायो । तर सागर थापाको पहिलाको फ्रि किक यसपाली दोहोरिएन र, नेपालले एक शुन्यको हार सामना गर्नु पर्‍यो ।

अब हारका बारेमा जति लेखे पनि केही हुने छैन । हारको कथामा के रोमाञ्चकता होला र ? बरु आजको दिन शुक्रबार परेर मात्र नेपालको हार भएको भनेर चित्त बुझाउँने हो कि !