तपाईले कहिले पुरस्कार जित्नु भएको छ ? जित्नु भएको छ भने पुरस्कार भन्ने बित्तिकै के सम्झनु हुन्छ ? मैले पनि निकै पुरस्कार जितेको छु । गफ होइन, साँच्ची । हाजिरीजवाफ, कविता वाचन, निबन्ध प्रतियोगितामा खुब पुरस्कार जितेको छु । पढाईमा पनि नजितेको भने होइन । तर मलाई पुरस्कार भन्ने बित्तिकै हाजिरीजवाफ प्रतियोगितामा कसैले नमिलाएर बाहिरिएका प्रश्नको उत्तर दिनेले पाएको चकलेट सम्झन्छु । हामी केटाकेटी छँदा सिनियर दाईदिदीहरु उफ्रिउफ्रि जवाफ दिएर हानाथाप गर्दै चकलेट लैजान्थे । मेरो मन कटक्क खान्थ्यो । सायद त्यसैको असर हुनु पर्छ, पुरस्कार भन्नेसाथ हाजिरीजवाफको त्यो चकलेटको सम्झना हुन्छ । बालापन पो हो कि । बालापनमा जे मनमा बिझ्यो त्यो सायदै हट्छ । यसैले बालबालिकालाई पुरस्कारस्वरुप उनीहरुको मनमा बिझ्ने पुस्तक तथा खेलौनाहरु दिईन्छ ता कि तिनीहरु पछि सृजनशिल बनुन् । तर सँधै सबै ठाउँमा यस्तो नहुँदो रहेछ । म यहाँ त्यस्तो सन्दर्भको बारेमा लेख्दैछु, जहाँ बालबालिकालाई पुरस्कारस्वरुप हतियार दिइन्छ, प्रथम र द्धितियलाई एके ४७ अनि तृतियलाई हाते ग्रिनेड ।
