'घुस, भष्ट्राचार र अपराधका मुद्दामा फसाईदैछ मधेसीलाई ।'

रातो राहदानीको दुरुपयोगमा भटाभट सभासदहरु पक्राउ परे । खासमा उनीहरुले राहदानी दुरुपयोग मात्र गरेका होइनन् । बिक्री नै गरेका थिए । सभासदको नामको रातो कुटनीतिक राहदानीमा अरु कसैले फोटो टासेर विदेश गइरहेका थिए । पक्राउ पर्नेमा अधिकतम सँख्या मधेसी मुलका सभासदको थियो । उनीहरुले बक्न थाले, 'मधेसी भएकाले फसाईएको हो । षड्यन्त्र भयो ।' सामाजिक सञ्जालका साइटहरुमा पनि यस्ता मुद्दाहरुले ढाकिन थाले ।



त्यतिमात्र होइन, पूर्वमन्त्री रहिसकेका सद्भावना आनन्दीदेवीका अध्यक्ष श्यामसुन्दर गुप्ता पवन सांघाइको अपहरणमा संलग्न रहेको भनि सप्रमाण पक्राउ परे । भर्खरै सूचना तथा सञ्चारमन्त्री रहिरहेको समयमा जेपी गुप्ता भष्ट्राचारको मुद्दामा जेल परे । उनीहरुले जेल जाँदै गर्दा मधेसी भएकैले फसाईएको आरोप लगाउँन भ्याए । अझ आन्दोलनको ध्वाँससम्म दिए । आजै मात्र वन राज्यमन्त्रीका पिए नागेन्द्र यादव घुस लिँदालिँदै रंगेहात पक्राउ परे । रंगेहात नै पक्राउ पर्दा पनि उनले मधेसी भएकैले षड्यन्त्र भएको गुड्डी दिए ।


वन राज्यमन्त्रीका पिएले रारा राष्ट्रिय निकुञ्जको अधिग्रहणमा परेको जग्गाको मुआब्जा मन्त्रीस्तरीय निर्णय गराएर चाँडै दिलाउने भन्दै उनले स्थानीय बासिन्दाबाट ३५ रुपैयाँका दरले घुस लिएका रहेछन् । सोही घुसको रकम पेश्की वापत ५० हजार लिदै गर्दा उनलाई अख्तियारको टोलीले रंगेहात पक्राउ गरेको हो । सुरुमा गल्ती भइगयो माफ पाउँ भनिरहेका उनी एकैछिन पछि षड्यन्त्र भयो भन्न थालेछन् ।

रंगेहात पक्राउ परेपछि वनराज्यमन्त्रीका पिए यादव । तस्विर (साभार : नागरिकन्युज)

प्रश्न उठ्छ, साँच्चै के मधेसी भएकाले नै कारवाहीमा परेका हुन् त यीनीहरु ? वा केही नलागे पछि राजनीतिक रंग दिन खोजेका मात्र हुन् ? यदि पुर्वाग्रह त्यागेर जवाफ दिने हो भने प्रश्न कुनै जटिल होइन । सबैलाई थाहा छ, यी माथि उल्लेखित विवरणहरुको वास्तविकता के हो ?

पक्राउ पछि जेल लगिदै श्यामसुन्दर गुप्ता (तस्विर साभार: कान्तिपुर)

मनोगत विश्लेषण छोडेर विगत हेर्ने हो भने प्रष्ट थाहा हुन्छ,अपराधका मुद्दामा कुनै जात बिशेषले छुट पाएको छैन । भष्ट्राचारको मुद्दामा जेल सजाय काटिरहेका पूर्वमन्त्री चिरन्जीवी वाग्ले मधेसका होइनन् । भर्खरै सुडान घोटलामा जेल परेकाहरु पो कहाँ मधेसी थिए र ?

तस्विर साभार : फेसबुक

अपराधीको कुनै जात हुँदैन, न कुनै धर्म हुन्छ । तिनीहरुको जात अपराधी मात्र हो र धर्म अपराध । यसैले आरोप प्रमाणित भएर जेल परेका अपराधीहरुलाई कुनै जात बिशेष मानेर पक्षपोषण नगरौँ । हाम्रो मान्छेको होइन, राम्रो मान्छेको वकालत गरौं ।